DAVAO CITY – Nahatud na ngadto sa ilang matag pamilya ang patay’ng lawas sa mga miyembro sa New People’s Army (NPA) nga nakabsan sa ilang kinabuhi atol sa nahitabong engkwentro tali sa kasundalohan sa Banaybanay, Davao Oriental.
Nakuha sa mga ginikanan ang patay’ng lawas ni alyas Buddy kaniadtong Setyembre 13. Samtang ang patay’ng lawas ni alyas Jumong ang na-claim na sa iyang ig-agaw. Gihatud usab sa 48th Infantry Battalion ang patay’ng lawas ni alyas Tatay Bert sa Barangay Kingking, Pantukan, Davao de Oro ngadto sa iyang pamilya ug gihatud sa Arakan Cotabato ang lawas ni alyas Joshua.
Samtang ang patay’ng lawas ni alyas Mando ang wala pa makuha. Sa pakighinabi sa Bombo Radyo Davao kang Capt. Mark Anthony Tito, tigpamaba sa 10th Infantry Agila Division, Philippine Army, gibutyag niini nga gi-abaga sa Provincial Local Government Unit sa Davao Oriental ang tanang funeral services sa nahisgutang mga indibidwal ug mihatag sab kini og food packs ug limited financial assistance.
Mitunol sab ang Local Government Unit sa Pantukan ug ang 10th ID og tabang pinansyal sa pamilya sa mga nahisgutan. Subay niini, nagpadangat sab ang kasundalohan og dakong pahasubo ngadto sa nabiling pamilya sa namatay nga mga NPA (VC 2 – TITO – PANGHITABO). Ang pahayag ni Capt. Mark Anthony Tito, tigpamaba sa 10th Infantry Agila Division, Philippine Army.
