DAVAO CITY – Padayong gipalawman sa kapulisan sa Hagonoy Municipal Police Station ang ilang gipahigayong imbestigasyon alang sa pagsuta sa motibo ug pag-ila kinsay responsable sa nahitabong pagpamusil sa duha ka mga indibidwal kagahapon sa Guihing National Highway, Hagonoy, Davao del Sur.
Nasayran nga dead on the spot ang pasahero samtang angol ang driver sa elf truck sa nahitabong shooting incident. Subay sa imbestigasyon sa Hagonoy Municipal Police Station, nasayran nga nagsakay lamang ang duha ka biktima sa usa ka elf truck.
Samtang nagsubay ang ilang gisakyan sa may national highway, kalit lamang matud pa nga misugat ang duha ka mga wala mailihing suspek sakay sa ilang motorsiklo ug dayong gipamusil ang mga biktima ug dali-daling miikyas padulong sa Padada nga direksyon.
Nakabsan sa kinabuhi ang rider sa Elf truck nga si Leo Cuarisma alyas Eyoy, 59 anyos, minyo ug residente sa Poblacion, Sta. Maria, Davao Occidental nga nakahiagum ug daghanang samad pinusilan nga miresulta sa iyang hinanaling kamatayon. Samtang samaran sab ang drayber sa truck nga si Roy Niel Mallari Diolata, minyo ug lumulupyo sa Purok Fatima, Poblacion, Sta. Maria, Davao Occidental.
Kasamtangang nagpaayo sa balay tambalanan ang samarang drayber samtang gihaya na ang patay’ng lawas sa kaubanan niini ngadto sa usa ka lokal nga punerarya sa Digos City.
