DAVAO CITY – Napalgan sa mga nakalusot nga kargamento sa Bureau of Customs – Davao Port ang usa ka smuggled luxury vehicle nga unang gideklara isip ginamit nga automotive parts.
Una nang nakadawat ug intelligence report ang Sasa Police Station mahitungod sa maong kargamento.
Human niana, dali-daling giinspeksyon sa mga sakop sa BOC Davao, PDEA 11 ug mga kapulisan ang container van nga gituohang nag-unod ug smuggled nga kotse ug diha nakumpirma nga usa kini ka puti nga Porsche 911 GT3 RS nga gitago sa mga kahon-kahon nga mga piyesa sa sakyanan.
Gituohan sab sa PDEA nga nag-unod ang sakyanan ug mga ilegal nga droga apan negatibo kini sa physical examination.
Sumala sa BOC Davao, niabot ang maong kargamento niadtong Agosto 31 ning tuig kasamtangan gikan pa sa nasud Japan ug nakapangalan kini sa JJCTD Import and Export Trading Corp.
Gibana-banaang mubalor sa kapin P15 million pesos ang maong smuggled nga sakyanan.
Giisyuhan na ang kumpanya nga nagpaluyo niini og kasong paglapas sa Republic Act 10863 kon Customs Modernization and Tariff Act ug kasamtangan nang gipahimutang sa BOC Davao Port ang nahisgutang kargamento.
VIA || Bombo LJ Florendo
