DAVAO CITY – Usa patay ug usa ang samaran sa nahitabong shooting incident sa Guihing National Highway, Hagonoy, Davao del Sur kagahapon sa udto.
Sumala pa sa imbestigasyon sa Hagonoy Municipal Police Station, nagsakay lamang ang duha ka biktima sa usa ka elf truck.
Samtang nagsubay ang ilang gisakyan sa may national highway, kalit nga misugat ang duha ka mga wa mailihing suspek sakay ang motorsiklo ug dayong gipamusil nila ang mga biktima ug dali-daling miikiyas sa direksyon padulong Padada.
Nakabsan sa kinabuhi ang sakay sa Elf truck nga si Leo Cuarisma alyas Eyoy, 59 anyos, minyo ug residente sa Poblacion, Sta Maria, Davao Occidental nga nakahiagum ug samad pinusilan nga miresulta sa iyang hinaling kamatayon.
Samtang samaran ang drayber sa truck nga si Roy Niel Mallari Diolata, mingyo ug lumulupyo sa Purok Fatima, Poblacion, Sta Maria, Davao Occidental.
Kasamtangang nagpaayo sa balay tambalanan ang samarang drayber samtang gihaya na ang patayng lawas sa iyang kaubanan sa usa ka punerarya sa Digos City.
Ginatutukan gihapon sa kapulisan ang mga tinubdang anggulo sa maong krimen.
via || Bombo LJ Florendo
