DAVAO CITY – Naharang sa gipahigayong checkpoint sa miaging adlaw sa Barangay San Jose, Digos City, Davao del Sur, ang usa ka lalaking suspek sa pagpatay kang barangay captain Lito Balasbas sa Brgy San Jose, Digos City human nga makuhaan og armas ug ilegal nga druga.
Nailhan sa mga kapulisan ang suspek nga si alyas “Elvin”, 36 anyos, ug nagpuyo sa Prk. Daisy, Brgy San Isidro, Kiblawan, Davao del Sur.
Nakitaan ang suspek ug kalibre punto kwarentay singko nga pistola, tulo ka magazine ug treynaty uno ka mga buhing bala; lakip na ang usa ka pakete sa gidudahang shabu nga nag-unod ug kwatro punto trenta gramos ug mubalor ang kantidad og kapin P64,000.
Nag-atubang na karun ug mga kasong pagsupak sa Republic Act 9165 kon Comprehensive Dangerous Drugs Act of 2002 ug Republic Act 10591 o Comprehensive Firearms and Ammunition Regulation Act si alyas Elvin samtang gikustodiya sa Digos City Police sa kasamtangan.
VIA || Bombo LJ Florendo
