DAVAO CITY – Magpasaka na ug kaso ang Police Regional Office 11 batok sa usa ka ulitawo nga nagpakatag ug fake news mahitungod sa hulga sa pagpangidnap, pagpanglugos ug holdap diri sa dakbayan ug uban pang bahin sa Davao Region.
Gipangunahan ni PRO 11 Regional Director Benjamin Silo ang imbestigasyon ug ingon man ang pagpasaka ug kaso batok kang Charles Japheth Lagradante Luzada, 18 anyos, nga nag-post sa social media kaniadto ug mga malisyosong impormasyon labot sa mga lugar nga ginaadtuan sa mga dautang elemento.
Una na kining gipanghimakak sa PRO 11 ug ingon pa, usa kini nga matang sa fake news.
Nangayo na ug pasaylo si Luzada sa publiko pinaagi sa usa ka social media post apan pursigido gihapon ang pulisya nga magpahamtak ug kaso batok kaniya.
Posibleng mag-atubang ug kasong paglapas sa Republic Act No. 10175 kon Cybercrime Prevention Act of 2012 ug mapriso sulod sa unom ka bulan nga dunay pyansang mubalor sa P40,000 hangtod P200,000.
Giawhag karon sa PRO 11 ang katawhan nga magmabinantayon ilabi na sa pag-post ug mga malisyosong impormasyon ug fake news sa social media ug ireport sa pinakaduol nga police stations ang mga nakit-ang krimen una pa ipadayag sa internet.
via || Bombo LJ Florendo
