DAVAO CITY – Nagpahigayon og imbestigasyon ang Mabini Municipal Station human sa nahitabong pagbusikad sa granada sa usa ka banana plantation sa Purok 18, Tagnan-an, Mabini, Davao de Oro, kagahapon sa buntag.
Sumala sa kapulisan, tulo ka wa mailhing lalaki ang gituohang naglabay ug duha ka buhing granada sa may TCBC Banana Plantation.
Gipadala sa maong lawak ang mga sakop sa Explosives Division uban ang K9 unit sa kapulisan.
Gikumpirma nilang dunay pagbuto nga nahitabo sulod mismo sa sagingan.
Nahitabo ang maong pagbusikad tungod sa kagubot tali sa duha ka kooperatiba sa lugar diin sumala pa, dunay ilegal nga pag-harvest sa ilang tanom nga cavendish banana.
Nahibaw-an sab nga gusto na muhawa ang pipila ka mga sakop sa kooperatiba ngadto sa pikas nga kooperatiba.
Walay natalang nangaangol sa maong pagpamusikad.
via || Bombo LJ Florendo
