DAVAO CITY – Mi-surrender na atubangan sa 25th Infantry Battalion ilawom sa 10th Infantry Agila Division ang kanhi myembro sa rebeldeng grupo sa miaging adlaw sa Camp Kalaw, Poblacion, Monkayo, Davao de Oro.
Ang maong kanhi rebelde nga si alyas “Delmar”, 28 anyos, usa ka bomb experts sa Southern Mindanao Regional Committee sa Communist Terrorist Group, ug nihulip sab kini sa kanhi pangulo sa grupo nga si Rico Rollon alyas Go/Pong/Migo.
Kahimumduman nga una nang nadakpan si Rollon kaniadtong Marso karung tuig.
Sa dose anyos nga pangidaron, nahimong myembro sa mga rebelde si alyas Delmar sugod kaniadtong Oktubre tuig 2012, ug nahimong responsable sa paggama ug mga pabuto alang sa bombing and landmine operations sa CPP-NPA sa tibuok rehiyon.
Sumala pa kang 25IB Commanding Officer Lt. Col. Michael Aquino, si Delmar misurender tungod sa gipakusgang combat operations.
Dugang pa, gibutyag usab ni Delmar nga ang naghitak nga kurapsyon sulod sa ilang grupo ug ang kakuwang sa pinansyal nga suporta sa ilang mga pamilya maoy nagtukmod kaniya sa pagtugyan ngadto sa pwersa sa gobyerno.
Gikalipay ni 10ID Commander MGen Nolasco A Mempin ang nahimong pagtugyan ni alyas Delmar sa gobyerno, ingon man ang paningkamot sa mga kasundaluhan nga mahibalik ang mga kanhi rebelde sa pagka-sibilisado.
Nadeklarang insurgency free ang Davao de Oro niadtong Hulyo karung tuig tungod sa pagkabungkag sa upat ka mga guerilla fronts nga nahimiyo sa nahisgutang probinsya.
via || Bombo LJ Florendo
