DAVAO CITY – Laing drug den na usab ang napuhag sa dakbayan sa Mati, Davao Oriental bag-ohay lamang.
Pinaagi sa hiniusang pwersa sa PDEA Regional Office XI – Davao Oriental Provincial Office, Police Regional Office XI RIU, Davao Oriental Police Provincial Office ug Mati City Police Station, malampusong nasikop ang anaa sa tulo ka mga indibidwal human nga nasakpang nanag-iya og iligal nga druga atol sa gilusad nga buy-bust operation sa Golden Valley, Barangay Central, Mati City, sa nahisgutang probinsya.
Nasayran nga target sa maong operasyon ang usa ka Norman Gil Empuesto alyas Bin, apan naka-ikyas kini human nga nakamatikod sa gipahigayong operasyon.
Hinoon, sikop ang anak niini nga iya usab nga kakunsabo sa maong iligal nga aktibidad nga si Norman Vence Empuesto ingon man ang mga mi-adto sa maong drug den nga sila Rex Fernandez ug Gelbert Yap.
Nakumpiska atol sa operasyon ang duha ka pakete sa gikatuohang shabu nga adunay gibana-banaang gimbug-aton nga 10 grams ug street value nga P150,000 ingon man ang mga nagkadaiyang drug paraphernalia.
Gikatakda usab nga mag-atubang ang mga dinakpan og kasong paglapas sa Republic Act 9165 o Comprehensive Dangerous Drugs Act of 2002.
