DAVAO CITY – Patay ang usa ka babaye human ang nahitabong aksidente sa Diversion road, Maa ning dakbayan sa Davao pasado alas 9:40 kaganihang buntag.
Nalambigit sa maong aksidente ang usa ka truck nga gimaneho sa usa ka Samson Plaza Corpuz, 50 anyos, minyo, driver ug residente sa San Vicente, Panabo, Davao del Norte; samtang nalambigit sab ang usa ka motorsiklo nga gimanehoan sa usa ka Jared Norman Perez Insong, 33 anyos, ulitawo ug residente sa Catalunan Grande ning syudad uban ang iyang back rider nga iya usab nga girlfriend nga si Deburah Ocite Sahay, 28 anyos, dalaga ug residente sa Bangkal ning dakbayan.
Ang duha ka mga sakyanan ang gabyahe pa-northbound sa Diversion road Maa Davao City.
Ayha ang insidente, nasayran nga nagsubay ang truck sa outer lane ug nag-una kini og dyutay sa motor nga anaa usab nagsubay sa tou nga bahin sa maong truck.
Sa dihang nakaabot sa lugar asa nahitabo ang insidente, kalit lang na slide ang motor sa balason nga bahin sa dalan partikular na sa ongoing road construction rason nga nalagpot ang back rider nga si DEBURAH paingon sa ilalom sa truck diin nalatayan kini sa ligid nga mao usab ang hinungdan sa hinanali niining kamatayon.
Samtang ang driver sa single motorcycle ang naka-angkon og minor injury.
Ang driver sa truck ang gikustodiya na karon sa Maa Police Station.
Samtang ang patay’ng lawas sa biktima ang gidala sa Rivera Funeral Parlor, Toril ning syudad.
Via || Allianne Ferandos Silao
