DAVAO CITY – Gipahayag ni PMaj. Eudisan Gultiano, tigpamaba sa Police Regional Office (PRO XI) nga pagatutukan sa Special Invetigation Task Group (SITG) ang pagpusil-patay kang Barangay Captain Elizalde Malcampo sa Barangay Kinuban, Maco, Davao de oro.
Ning kasamtangan, nagpadayon gihapon ang imbestigasyon sa kapulisan alang sa pagsuta sa motibo ingon man ang pag-ila sa suspek nga mipatay sa kapitan.
Kahinumduman, gipusil-patay ang biktima sulod sa walo ka higayon sa wala pa mailhing mga suspek nga nagsakay sa ilang motorsiklo nga walay plate number.
Nasayran nga naghatud lamang ang biktima sa iyang apo sa Andili Elementary School sa lungsod sa Mawab nga silingang lungsod sa biktima.
Sa dihang pauli na ang biktima sa lungsod sa Maco, kalit kining gibabagan sa mga armado ug gipusil sa makadaghang higayon nga miresulta sa kamatayon niini.
Samtang mipadangat usab ug pahasubo ang kapulisan sa nahabiling pamilya sa biktima.
Hustiya ang singgit karon sa mga higala, kabarangay ug kabanay sa nasangpit nga kapitan.
