DAVAO CITY – Laraw karun sa City Transport and Traffic Management Office (CTTMO) nga daghanan pa nga mga imprastraktura ang pagatukuron aron nga mapalambo ang road safety ug mamahimong komportable ang mga bikers sa siyudad.
Sumala pa kang CTTMO chief Dionisio Abude nga mas daghanang bicycle lanes ang plano i-desenyo alang sa itukod pa nga mga kadalanan sa dakbayan sa umaabot nga panahon.
Ipatuman sab sumala pa ang Solar ug bollards diin ilakip kini sa Amended Bicycle and Light Mobility Vehicle Ordinance ning dakbayan diin tumong niini nga mapalambo ang kaluwasan sa mga bikers ug uban pang mga road users.
Sa milabay nga tuig, ang lokal nga kagamhanan ug ang Department of Transportation ang mi-abli sa bag-ong 54.74- kilometer Metro Davao Bike Lane Network nga nagkutay sa 14 road sections ning siyudad.
Aron nga ma-promotar ang active transport isip efficient mode of transportation, una ng gisuspende sa lokal nga kagamhanan ang duruha ka ordinansa nga nagmando sa registration alang sa recreational ug transportation bicycles.
Pinaagi niini, mamahimong makagamit ang mga dabawenyos sa bike lanes nga walay kahadlok nga mamultahan tungod sa non-registration gumikan kay gi-usa na lamang ang duruha ka mga ordinansa nga una ng gipanday.
Sa milabay nga tuig nga 2021 Mobility Awards, naangkon sa dakbayan ang Silver plaque gumikan sa pagpaningkamut sa pagtukod ug bike lanes ug mamahimong usa ka bike-friendly city.
