DAVAO CITY – Hangtud karun dili pa gihapon madawat sa kabanay sa usa ka 42 anyos nga lalaki kinsa nakaplagan na lamang nga wala nay kinabuhi human nga gituohang nalumos kini samtang naligo sa Semong River.
Una niini, mismong ang kabanay sa biktima ang mikumpirma sa patay’ng lawas ni Roy Laguitao, residente sa Prk.2, Barangay Gabuyan, Kapalong, Davao del Norte gumikan sa tattoo sa lawas niini.
Una ng gibutyag ni alyas “Melot” nga samtang nanagat kini sa Liboganon River sa Prk.12-C Cali-an, Barangay Maniki, namatikdan niini ang patay’ng lawas nga naglutaw hinungdan nga nangayo kini ug pakitabang sa otoridad.
Gilayon sab nga miresponde sa maong dapit ang mga sakop sa Municipal Disaster Risk Reduction and Management (MDRRM) ingon man Bureau of Fire Protection Special Rescue Force (BFP-SRF).
Subayon sab karon sa otoridad kung aduna bay foul play sa kamatayon sa biktima.
