DAVAO CITY – Gikalipay sa kasundalohan ang plano sa dakbayan nga amyendahan ang anti-discrimination ordinance arun nga malakip niini ang mga kanhi rebelde ug mga beneficiaries ilabi na kung ideklara na ang usa ka lugar nga cleared na sa kumunistang kalihokan.
Sumala pa kang Maj. Gen. Nolasco Mempin, commander sa 10th Infantry Division (ID), nga dakung tabang ang maong lakang arun nga matabangan ang mga kanhi rebelde nga makasugod sa ilang kinabuhi ug wala silay kahadlok sa diskriminasyon.
Kahinumduman nga ilalom sa area sa 10ID ug Police Regional Office–Davao Region, ubay-ubay na ka mga guerilla fronts ug Pulang Bagani Command posts sa New People’s Army’s (NPA) Sub-Regional Committee (SRC) 5 ang nabungkag.
Gihulagway kini sa kasundalohan nga usa ka dakung kalampusan ilabi na nga ang SRC5 ang usa sa mga dakong grupo sa NPA sa nasud.
Una ng gi-welcome sa lokal nga kagamhanan ang kalampusan sa pagtahan sa mga kanhi rebelde arun nga mubalik ngadto sa kumunidad.
Samtang gibutyag ni Acting Mayor Sebastian Baste Duterte nga makiglambigit kini sa City Council arun masiguro nga ang mga kanhi rebelde dli ma-discriminate sa higayon nga mangita sila ug panginabuhian ug trabaho.
Base sa listahan giila ang Communist Party of the Philippines-NPA isip terrorist organization sa United States, European Union, United Kingdom, Australia, Canada, New Zealand, ug Pilipinas.
