DAVAO CITY – Luyo sa nahimong pahayag sa Catholic Bishops Conference of the Philippines (CBCP) nga mamahimong gamiton ang mga simbahan alang sa vaccination sites sa higayon nga sugdan na ang mass vaccination, gibalibaran kini sa kagamhanan.
Sumala pa kang OIC-City Health Office head Dr. Ashley Lopez, mas maayo kung ipahigayon ang pagbakuna sa mga tulonghaan kaysa sa mga simbahan gumikan kay mas lapad ang lugar niini.
Gawas niini, gamiton sab sumala pa ang 18 ka mga District Health Center ingon man dagkong unibersidad ug tulonghaan dinhi sa dakbayan aron lamang maakomodar ang ihap sa mga magpabakuna.
Kahinumduman nga bisan madugay pa ang pag-abot sa uban pa nga mga bakuna, nangandam pa gihapon ang dakbayan niini aron lamang masiguro nga han-ay kini nga mapahigayon.
Una ng nakig-negosasyon si Davao City Mayor Inday Sara Duterte sa kompanyang Astrazeneca nga posibleng moabot sa bulan sa Hulyo.
