DAVAO CITY – Gipasaka-an na ug kasong grave threat si SPO1 Nelson Galvan, nga nadistino sa Buhangin Police Station nga gi-reklamo nga nani-on ug armas sa silingan.
Nasayran nga gi-inquest si Galvan niining milabay nga Sabado subay sa reklamo nga giduso sa usa ka Mark ‘Balad’ Nacional nga nanimuyo sa South Villa Country Homes.
Nabilanggo na karon sa Talomo Police Station ang gi-reklamo nga police kinsa gi-disarmahan sa iyang mga kaubanan.
Samtang daku ang pagtuo sa Police Regional Office (PRO) eleven nga kung mamatud-an nga sad-an mataktak sa serbisyo si SPOI Galvan, kinsa gi-reklamo sa iyang mga silingan nga labihan ka abusado ug magmaoy matag panahon nga mahubog.
Kini ang gihatagan ug katin-awan ni PCI Milgrace Cajes Driz, tigpamaba sa Police Regional Office Eleven, kinsa namahayag nga maisip nga grave offense ang paghasi ngadto sa mga sibilyan, labi na kung migamit ug armas ang police.
Hinoon sumala pa kang Driz mga mo-agi sa summary hearing procedure si SPO1 Galvan ug kung mogula nga guilty dismissal sa trabaho, o kaha demotion sa trabaho ang mamahimong silot niini.
Subay niini gipahimangno-an ni Driz ang kapolisan sa dakbayan nga likayan gayud ang paggamit ug armas kung naka-inum o kaha init ang ulo.
