DAVAO CITY – Mikabat ngadto sa sietesentos mil ka pesos ang danyos sa miulbo nga sunog nga nakaugdaw sa mokabat ngadto sa baynte ka mga kabalayan sa Purok 10, Barangay 76-A, Bucana, ning dakbayan sa Davao kaganinang alas 9:30 ang takna sa buntag.
Temporary nga gipahimutang ang mga biktima sa Busna Gym sa Bucana ug sa maong dapit sab ihatag ang mga tabang gikan sa Barangay ug sa City Social Services and Development Office.
Nakadawat na sa mga pasi-unang panabang ang mga biktima kaganinang buntag.
Mismong si Kapitan Rolando Trajera ang mimando sa mga nasunogan sa pagpatala alang sa dawaton nga mga hinabang.
Sa pasi-una nga tala-an sa mga biktima mikabat ngadto sa dese sais ka mga house owner ang nangabiktima, duha ang mga renters, boarders – 1, sharer – 4.
Gilauman pa kini nga mapun-an, samtang padayon ang pagsurvey sa dapit sa mga sakop sa CSSDO.
Partial pa ang nakuha nga talaan gumikan kay ang pipila sa mga nasunogan anaa sa ilang trabaho.
Misugod ang sunog sa pinoy-anan sumala pa sa pinoy-anan sa usa ka Myrna Genovia, diin sumala pa kang Modesto Genevia, igsuon sa biktima dunay nagpuyo sa silong niini nga posibling nakalimot ug nabiya-an ang lining-ag gumikan kay nagapaninda kini sa eskwelahan.
Paspas ang pagsilaob sa kalayo gumikan kay gama lamang sa kahoy ang sagad sa kabalayan sa nahisgutan nga dapit. Bisan ang bag-ong tukod nga balay kalakip sa naugdaw sa nahisgutan nga sunog.
Duna sa’y traysikad nga naugdaw sa sunog.
Sagad sa mga biktima wala’y nadala nga mga butang gikan sa misilaob nila nga balay gumikan sa kakalit sa panghitabo.
Didto sa simbahan si Modesto dihang kalit nga nasunog ang ilang dapit.
