DAVAO CITY – Mipatim-aw na sa Davao City Anti-Scam Unit ang mga representante sa Mindanao Grassroots People’s Coalition (MGPC) human gi-reklamo nga nahilambigit sa pyramiding scam.
Gitataw sa grupo nga wala’y kamatuoran nga nangulekta sila ug kwarta sa ilang mga membro ug gitataw nga boluntaryo lamang ang pagsulod sa ilang grupo.
Bisan pa niini gipahayag ni Ben Jabili imbestigador sa anti-scam unit usa ka Jessa De la Cruz Bañados mao ang mi-reklamo nga gipangayo-an siya ug tresientos ka pesos nga membership fee aron nga makabaton ug benepesyo nga grocery items nga mobalor ug singkwenta mil ka pesos.
Dugang pa sa reklamo ni Bañados nga dugang saisentos singkwenta pesos sab nga membership fee ang mohatg ug kahigayonan sa mga membro nga makapili posisyon sa MGPC, dugang singkwenta mil ka pesos nga grocery items, traynta y singko pesos nga cash ug usa ka motor.
Sumala sab ni Bañados nga mipasakop siya sa grupo gumikan kay gi-recruit kini sa iyang higala ug sa pasalig sa grupo nga magamit ang membership fees sa pagpalit ug baboy ug baka.
Apan sumala pa kang Bañados human sa pipila ka bulan wala siya’y nadawat nga mga benepesyo sa grupo. Dugang pa kang Bañados miduso sab ug reklamo ngadto sa City Mayor Office ang EJCs Sisters gikan sa Tugbok District hinongdan nga milusad ug hugtanon nga imbestigasyon ang City Anti-Scam Unit.
Gipasalig ni Jatili nga padayon ang ilang pagpangita ug mga ebedensya batok sa Mindan ao Grassroots People’s Coalition kalakip sa milusad ug imbestigasyon ang NBI ug ang hut-ong sa kapolisan.
Hugtanon sab ang pahimangno ni Davao City Mayor Inday Sara Duterte-Carpio ngadto sa publiko nga likayan ang pagpasakop sa Mindanao Grassroots People’s Coalition, Cesars City Corporation, Mindanao Bankers Monetary Council, Mindanao Inigenous Soveriegn People for CCC, Mindanao Golden Mine for Filipino, Mindanao Filipino Religious Sector, ug Mindanao Filipino Youth Leaders for CCC.
