DAVAO CITY – Migula karon ang anggulo nga giinitan sa New People’s Army (NPA) ang gipusil-patay nga Barangay Kapitan sa Talandang, Tugbok District nga si outgoing Barangay Captain Reynaldo Dumagan.
Hinoon gitataw ni Davao City Police Office (DCPO) Director Police Senior Supt. Alexander Tagum nga dunay migula nga impormasyon nga supporter kaniadto si Dumagan sa kalihukan sa NPA, apan mi lie low, gumikan sa kampanya sa kagamhanan batok sa insurhensiya.
Gitataw sab ni Tagum nga gimugna na ang special investigation group sa pagpanguna sa Criminal Investigation Group (CIDG), Crime Lab, ug uban pa nga hut-ong sa kapolisan sa dakbayan.
Samtang sumala sab kang PCI Ronald Lao, hepe sa Talomo Police Station nga wala makita sa sakyanan sa Barangay Talandang kung kinsa ang mipusil patay kang Dumagan gumikan kay boka lamang sa armas ang gipagimaw sa bintana sa pick-up nga gisakyan sa mga mamumuno.
Gituohan nga de silencer nga armalite ang gigamit sa mga kriminal samtang padulo.
Planado sumala pa ang pagpusil-patay kang Dumagan gumikan kay gi-atangan kini sa mga kriminal samtang nahi-agi sa lugar sa ilang pagsugat sa airport sa ilang bisita.
Wala pa maseguro sa kapolisan kung unsa nga kalibre sa armas ang gigamit sa pagpusil-patay sa kapitan gumikan kay wala’y baseyo nga nahipus gikan sa crime scene.
Wala sab nila makita ang plate number sa pick-up sa Kapitan.
