DAVAO CITY – Gi-imbestigahan na sa kapolisan sa dakbayan sa Digos ang usa ka bording house nga gilungkab sa wala maila nga mga suspetsado.
Nasayran nga ang biktima nga usa ka Naguia Macasimbual, 31 anyos, salesman, residente sa Mabini St., Digos City nga igo na lamang nagpakitabang ngadto sa buhatan sa kapolisan sa dakbayan sa Digos human malungkab ang iyang boarding house.
Saysay pa sa salesman nga sa pag-uli pa niya sa ilang pinoy-anan mga alas 6:30 ang takna sa kagabhi-on, nadiskobre na lamang niini nga nabiktima na siya sa pagpanglungkab sa wala pa maila nga suspetsado.
Milusot ang suspek sa bentana nga bahin, nga dunay mosquito screen, diin didto milusot ang wala mailang suspek ug milahos sa iyang lawak.
Gipangdala sa wala maila nga suspek ang iyang mga mahalon nga gamit sama na lamang sa tulo ka unit sa cellphone, ug mga sapatos.
Wala pa sila’y matudlo nga suspek.
Natahap ang kapolisan sa Digos nga mga sakop sa akyat bahay gang ang mibiktima sa salesman ug mga kaubanan.
