DAVAO CITY – Adunay nakitang lig-on nga basehan ang City Prosecutor aron nga pasakahan ug kaso ang usa ka lalaki nga nasikop sa otoridad human nga nagdala ug ginadili nga droga.
Girekomenda ni Prosecutor Irene Joy Tala-Montero ang pagpasaka ug kasong kalapasan sa Sections 11 ug 12 sa RA 9165 (Comprehensive Dangerous Drugs Act of 2002) sa dinakpan nga si Amer Candao Avido.
Kahinumduman nga nagduty ang police officer sa bisinidad sa Roxas avenue, dihang nakita niini si Avido nga naghupot ug itom nga sling bag ug paingon sa ilang lokasyon.
Gihiling matud pa sa pulis ang dala nga bag ni Avinido isip kabahin sa gipatuman nga security measure.
Apan kalit nga midagan ang suspek hinungdan nga gigukod kini sa kapulisan ug nasikop.
Nakuha sa posisyon niini ang plastic nga pakete nga gi-undan sa pinaugang dahon sa marijuana, usa ka improvised wood pipe, usa ka rolled cigarette paper nga gamiton isip tooter, ug mga plastic cellophane nga gisulod usab sa kolor blue nga pouch.
Nagpositibo sab ang suspek sa THC-metabolites nga usa ka byproduct sa marijuana.
