DAVAO CITY – Samdon nga gidala sa Southern Philippines Medical Center (SPMC) ang mag-uuma nga gipusil samtang nagtumod lamang sa iyang produkto gikan sa uma mga alas 6:00 ang takna sa kabuntagon sa merkado publiko sa dakbayan sa Digos.
Naila ang biktima nga usa ka Danilo Villarosa Hernandez, alyas Dodong, traynta y tres anyos, menyo, mag-uuma, residente sa Purok 1, Barangay Mabuhay, Bansalan, Davao del Sur.
Nasayran nga sakay ang biktima sa iyang motorsiklo gikan sa ilang lungsod sa Bansalan, Davao del Sur padulong sa Digos Public Market aron nga itumod ang iyang produktong utanon.
Samtang nagdagan ang pedecab, subay sa national highway, sa Digos City, paghi-abot sa Barangay Tres de Mayo, atubangan sa Digos Memorial Park, gisundan kini ug usa ka Meo nga Motorsiklo nga dunay duha ka mga suspek nga sakay ug wala’y pupangutana gipusil ang biktima, hinongdan nga nakahi-agum ug mga samad pinosilan ang biktima sa iyang ulo, bukton, ug tuo nga bahin sa iyang braso.
Ang biktima kritikal ang kahimtang sa dihang gidala sa Davao del Sur Provincial Hospital, hinongdan nga gibalhin sa Southern Philippine Medical Center.
Nasayran nga ang mga suspetsado nga sakay ug meo nga motorsiklo, nagsul-ob ug jacket nga dunay hood nga nakatabon sa ilang ulo nga bahin ug nagsul-ob ug maong nga pantalon, ug dunay gitaptap nga panyo sa ilang nawong nga bahin.
Wala’y na-recover ang kapolisan sa Digos nga bisan unsa man nga baseyo sa bala sa mga suspek.
Gumikan niini gikatuohan nga revolver ang gigamit sa mga suspek.
Padayon pa nga nagpahigayon ug dugang imbestigasyon sa Digos City PNP aron nga maila ang mga suspek ug masayran ang motibo sa krimin.
