DAVAO CITY – Gipanghimakak sa Criminal Investigation and Detection Group (CIDG) eleven nga dunay gun running syndicate sa Davao nga nagapamaligya ug mga armas ngadto sa mga dautan nga mga elemento.
Kini human nga nadakpan ang upat ka mga tawo nga namaligya ug mga armas.
Sumala pa kang Police Supt. Warren Dablo, Assistant Regional Director CIDG Eleven nga dayo lamang sa dakbayan sa Davao ug dili taga-dinhi ang mga suspetsado nga nangadakpan kagahapon human mamaligya ug armas.
Arestado sa kapolisan, kauban ang CIDG Eleven si Melvin Hao nga taga-San Antonio, Matina nga nakuha-an ug M16 Armalite rifle nga nagkantidad ug P100 ka libo ka pesos, nga duna pa’y mga buhi nga mga bala, usa ka shot gun ug usa ka .38 revolver, lakip na ang spear parts niini.
Lain pang nadakpan sa follow-up operation sa CIDG mao si Manuel Matig-a, sa SIR Matina diin nakuha ang tulo ka mga .45 caliber pistol, ug ang duha nga sila si Justine Lupingan, ug ang kanhi sundalo nga si Noel Sabrisa nga nakuha-an sab ug .45 caliber pistol nga ilang gibaligya sa barato nga kantidad nga baynte mil ka pesos matag usa.
