DAVAO CITY – Hingpit na nga gipasakahan sa City Prosecutor’s Office ang usa ka lalaki nga mi-record ug video sa iyang boardmate nga naligo sulod sa banyo sa iyang boarding house sa Hilltop Village Bajada ning dakbayan.
Girekomenda ni Prosecutor Victoriano Bello Jr. nga pasakahan ang suspek na si Richard Gera ug kalapasan sa Republic Act 9995 o Voyeurism Act of 2009.
Sa gipagula nga resolusyon nga gi-aprubahan ni Prosecutor Shahruddin Roberto Sencio Jr., adunay nakitang basehan si Bello aron pasakahan si Gera subay sa reklamo nga giduso sa usa ka alyas Marie.
Pinasikad sa affidavit sa biktima, naligo sumala pa siya dihang nakadungog kini ug kasikas sa katapad niini nga banyo nga mi-abli sumala pa ang pultahan.
Wala sumala pa kini gitagad ni alyas Marie ug nagpadayon lamang sa iyang pagligo hangtud nga namatikdan niini nga adunay itom nga plastic tray sa bungbong nga bahin sa banyo.
Mihunong sumala pa sa iyang pagkaligo ang biktima ug dihang iyang gikuha ang plastic tray, nakita sumala pa niini ang cell phone nga padayon nga nag-record.
Gilayon sumala pa niya nga gituktok ang pultahan sa katapad nga banyo apan wala sumala pa kini nga gi-ablihan sa suspek.
Hinungdan nga nangayo kini ug assistance sa ilang landlady. Atol sa pagbalik niini, nakita sumala pa niya ang lalaki nga naka-half-naked ug nakaangkon ug samad sa iyang bukton human nga milukso kini gikan sa bungbong.
Unod sumala pa sa cell phone ang impormasyon kalabot sa pagkatawo sa suspek.
Matud pa kang P01 Crizilda Meios Dapook, miadto sumala pa sa ilang buhatan ang biktima aron nga ipatala ang iyang reklamo batok sa nanilip nga suspek.
