DAVAO CITY – Gipangita na karon sa kapulisan sa Maragusan Municipal Police Station ang karelasyon sa usa ka babaye nga nakaplagan na lamang nga wala nay kinabuhi ug putol ang ulo.
Kahinumduman nga gihatud na sa lubnganan ang biktima nga nailang si Evelyn Fernandez, 23, minyo, sales crew sa bakery, residente sa Purok Tambis, Barangay Mapawa sakop sa nahisgutan nga lalawigan.
Hustisya ang gisinggit karon sa pamilya sa biktima dungan sa panghinaut nga masikop gilayon ang responsable sa krimen.
Nasayran sa imbestigasyon sa kapulisan nga usa ka concerned citizen ang nangayo ug pakitabang human nga nakaplagan ang biktima nga nagsugod na ug kadugta sa Purok Santol, Barangay Poblacion sa nahisgutan nga lugar.
Gikanayong walay ulo ang biktima apan narekober kini tulo ka metros ang gilay-on gikan sa patay’ng lawas. Aduna sumala pay karelasyon ang biktima nga maoy nagasundo niini sa iyang gi-trabahoan ug kaniadtong Mayo 1 kini ulahi nga nakita.
Nasayran sab sa kapulisan nga buwag sa iyang bana si Evelyn apan buot kini nga makigbalik kaniya butang nga wala miuyon ang iyang bag-o nga karelasyon.
Sa ulahing pagpanubay sa kapulisan, wala na matud pa sa iyang gi-arkilahan nga boarding house ang ka-relasyon sa biktima hinungdan nga ila kini karon nga gipangita nga imbestigahan.
Subayon sab karon sa kapulisan ang motibo sa krimen.
