DAVAO CITY – Gibasura sa Office of the Ombudsman Mindanao (OMB-Min) ang kasoing kriminal batok sa kanhi mayor sa Lianga, Surigao del Sur gumikan sa gikanayong pagsulod sa ma-anomalya nga bidding.
Subay sa desisyon ni OMB-Min prosecutor Modesto Onia Jr., nga gi-aprubahan ni Deputy Ombudsman for Mindanao Rodolfo Elman, gilimpiyohan ang pangalan ni Roy Hegio Sarmen gikan sa kasong grave misconduct ingon man “conduct prejudicial to the best interest of the service”.
Kalakip sab sa gilimpiyohan ang pangalan sa usa ka Roger Glenn Sanchez, head of the Bids and Awards Committee (BAC) secretariat.
Apan gimando sa OMB-Min ang suspension sa uban pang BAC members nga gilangkuban nila ni Noel Cunanan, Redentor Dela Cruz, Dr. Leo Alfonso Sarmen, Marlyn Lobo, ingon man Edwin Igsoc human nga guilty ang mga nahisgutan tungod sa simple neglect of duty.
Pinasikad sa desisyon, nakahimo sumala pa ang mga nahisgutan ug irregularidad sa gipahigayon nga negosasyon alang sa pagpalit o paggamit sa Grassroots Participatory Budgeting Program sa Department of Agriculture (DA) uban ang budget nga P939,582 kaniadtong tuig 2014.
Pakyas ang mga nahisgutan nga makapangita ug alternatibong supplier inay direkta lamang nga gipili ang Green Planet Plant Nursery nga usa ka tin-aw nga kalapasan sa rules and regulations sa Government Procurement Reform Act (Republic Act No. 9184).
Nasayran nga ang Lianga mao ang ika-upat nga “class town” sa Surigao del Sur nga adunay 30,000 ka mga residente.
