DAVAO CITY – Human sa Tacurong City, Sultan Kudarat twin bombing nga naka-angol ug pito ka mga tawo, gipakatag sab dayon ang nueventa y singko porsiento sa kapolisan sa dakbayan sa Davao.
Sumala pa kang Davao City Police Office (DCPO) Spokesperson Police Senior Inspector Maria Teresita Pkaza Gaspan nga gimando ni Police Senior Inspector Alexander Tagum, ang DCPO Director nga nueventa y singko porsiento sa ilang pwersa ang ipakatag sa nagkada-iya nga bahin sa dakbayan sa Davao.
Lakipan sab kini sa mga ginsakpan sa dose ka mga police station sa dakbayan sa Davao, diin ipagawas sab kini sa mga pampubliko nga mga dapit.
Sila ang mobantay sa mga pampubliko nga mga dapit sa dakbayan. Ang mahabilin nga singko porsiento mao ang motala sa mga krimin sa ilang area of responsibility.
Gi-angkon sa DCPO nga ilang gikonsidera kanunay nga adunay plano nga samukon ang kalinaw nga natagamtaman sa katawhan sa dakbayan. Lakip sa ipatuman sa kapolisan ang Oplan Kapkap. Tumong niini nga mapugngan ang illegal nga pagsulod sa mga armas. Mopahigayon sab sila ug pag-checkpoint sa bisan asa nga bahin sa dakbayan.
