DAVAO CITY – Manumpa atubangan kang Davao City Mayor Rodrigo Duterte sa ilang katungdanan ang 910 ka mga Auxiliary Police nga ubos sa Davao City Police Office (DCPO).
I-distino sila sa dose ka mga police station sa dakbayan sa Davao ug mamahimong dugang pwersa. Nasayran gikan kang Police Senior Inspector Maria Teresita Plaza Gaspan, tigpamaba sa DCPO kaganinang alas 9:00 ang takna sa buntag tapukon ang tanan nga mga nakapasar sa napulo ka adlaw nga pagbansay-bansay alang sa pasi-una nga pagpanalipod sa ilang kaugalingon ug unsa-on sa pagdakop sa mga dautan nga mga elemento.
Gipahigayon ang panagtapok sa Almendras Gym alang sa ilang pagpapanumpa. Kalakip sa nahisgutan nga kalihukan si DCPO Director Police Senior Supt. Alexander Tagum.
Ang mga Auxiliary Police kalakip sa mga mobantay sa umaabot nga mga dagku nga mga kalihukan dinhi sa dakbayan sa Davao isip pagpalig-on sa Iron City.
Magdawatan sila ug tag-sais mil ka pesos nga sweldo matag bulan.
