DAVAO CITY – Nailhan na ang siyam sa dose nga sumala pa miyembro sa New People’s Army (NPA) nga suspek sa pagpatay kang Datu Banadjao Mampaundag ug anak niini nga si Jhonard sa Purok 9, Sitio Igang, Palma Gil, Talaingod, Davao del Norte.
Nasayran sa Bombo Radyo Davao gikan kang Police Chief Inspector Wereprendo Regidor sa investigation section sa Davao del Norte Police Office nga nailhan nila ang mga suspek base sa pahayag sa mga saksi.
Mibalibad usa ang maong opisyal nga direktang pangalanan ang mga suspek nga wala pa hingpit nga nadakpan. Hinuon, gi-andam na sa PNP Davao del Norte ang pagpasaka ug kaso nga two counts of murder batok sa mga suspek.
Samtang, mihangyo usab ang pamilya nga ilubong usa ang mga patayng lawas sa tribal datu ug ang anak niini sa dili pa man asikasohon ang pagpasaka sa maong kaso nga two counts of murder batok sa siyam nga mga suspetsado.
