DAVAO CITY – Temporaryong mohunong una sa ilang operasyon karong school year 2021 ang siyam ka mga pribadong tulunghaan sa Davao region.
Gikanayon ni DepEd 11 spokesperson Jenielito Dodong Atillo, wala pa nila nadawat ang board resolution gikan sa board of trustees ug sa board of directors nga mikompirma labot niini, hinungdan nga dili pa nila opisyal nga madeklara ang pag-undang sa operasyon sa maong mga tulunghaan human madawat nila ang sulat gikan sa mga nahisgutan.
Samtang, gibutyag usab ni Atillo nga niadtong milabay nga tuig moabot usab sa 47 ka mga pribadong mga tulunghaan sa region 11 ang nanirado gumikan sa epekto sa covid 19 pandemic.
Hinuon, balik na sa ilang operasyon karong school year 2021 – 2022 ang nahisgutang mga tulunghaan.
Na-una na usab nga gibutyag ni Atillo nga mitala lamang ug ubos kaayo nga ihap sa mga enrollees ang mga private school sa rehiyon karong tuiga.
Gilantaw sa opisyal nga kini ang resulta sa pag-balhin sa mas daghang mga estudyante gikan sa mga pribadong tulunghaan ngadto sa mga public school gumikan sa pandemya.
Hangtud kagahapong adlawa Sept 15, 2021, gikanayon ni Atillo nga moabot na sa 1,285,891 ang kinatibuk-ang ihap sa mga estudyante sa tibuok region 11 ang nagpa-renroll alang sa school year 2021 – 2022 sa mga public schools, mas ubos sumala pa kini kung itandi sa ihap sa mga nagpa-enroll niadtong 2020 nga naa sa 1,289,331.
