Nakurat sa kahadlok ang kapulisan human nga makita ang siyam ka banakon nga gisulod og bag sa usa ka lalaki human nga mababagan kini sa checkpoint sa M’lang, probinsiya sa Cotabato.
Sumala kang Cotabato Police Provincial Office director, Police Colonel Gilberto Tuzon, nga samtang nagpahigayon og gunban checkpoint ang kapulisan sa M’lang Municipal Police Station, gipahunong sumala pa nila ang usa ka lalaki nga sakay og motorsiklo nga adunay dala nga pack-bag.
Sa naandan sa maong checkpoint gipaabli sa kapolisan ang bag sa maong lalake nga abi nila og baril ang sulod niini, gumikan na usab sa kabug-aton sa maong pack-bag, apan dako ang kakurat sa kapulisan gumikan ang sulod sa bag mao ang mala nga siyam ka banakon kon King cobra.
Gumikan sa kabalaka nga mapaakan, ila na lamang gipalarga si alyas Rommel nga giingong eksperto sa pagpanakop og halas.
Giangkon na hinuon sa mga pulis nga sayop ang ilang gihimo gumikan ila matud pa unta kini nga gitunol ang mga bitin ngadto sa buhatan sa Department of Environment and Natural Resources kon DENR.
Nagpasidaan na lamang ang lokal nga panggamhanan sa M’lang ngadto sa mga manakupay og King cobra nga itunol ngadto sa DENR ang mga halas nga ilang madakpan susama sa banakon nga peligro kaayo gumikan sa kalala niini.
