Patay nang nakaplagan si Warren Masquida, 9-anyos, residente sa Brgy. JP Laurel, nga nawala human malumos sa Lasang River, Purok Centro 1, niadtong Hulyo 12 pasado alas 6:30 sa buntag.
Narekober sa mga residente ang patay’ng lawas sa biktima kagahapong adlawa, pasado alas 10:00 ang takna sa buntag.
Nasayran nga OFW sumala pa ang inahan sa bata og wala gilayon kini nahisayod sa gidangatan sa iyahang anak.
Kahinumduman nga dili kini ang unang insidente sa Lasang River.
Sa milabay nga panahon,adunay usa ka 13-anyos nga bata ang nakaplagang patay nga naglutaw-lutaw sa susamang suba, niadtong Hunyo 15 ning tuiga pasado alas 12:00 sa udto.
Tungod niini, gipahimangnoan sa mga otoridad ang publiko nga likayan ang pagligo o pagdula sa sapa, hilabi na og taas ang tubig ug kusog ang sulog.
