Nabug-og ug nagkadugo ang nawong sa usa ka 89-anyos nga lolo nga giilang si Nicholas Bais human kining gikulata samtang igo lamang nanaygon sa Dansulan, Bais City, Negros Oriental.
Saysay pa sa anak sa biktima nga igo lamang matud pa nanaygon ang iyang amahan gamit ang iyang gitara sa panimalay sa usa ka giilang “Pikroy” diin human matud pa niining gihatagan og P20 ang biktima, gilayon na kining milakaw.
Apan, gisundan kini sa maong suspetsadong gikatahong hubog ug giilog sa suspek ang gitara sa biktima nga gigamit niini sa pagpanalaygon ug gipuspus sa biktima.
Gani, wala pa nakontento ang suspek, gipatiran usab niini si Bais, hinungdan nga naglisod kini og bakod.
Gumikan sa panghitabo, naglisod og tulog ang biktima gumikan hilabihan kasakit ang gibati niini.
Gawas sa naangkong mga samad sa ulo ni Lolo Nicholas, nawad-an usab kini og panginabuhian gumikan naguba na ang gitara niini.
Sa karon, padayong ginaimbestigahan sa kapulisan ang panghitabo ug sa higayong mapamatud-ang gibuhat sa suspek ang krimen, mag-atubang kini og tukmang kaso.
