DAVAO CITY – Nahimong sadya ug malinawon ang natapos nga 87th Araw ng Davao kagahapon, adlawng Domingo, Marso 17, diin kapin 300 ka mga contigients ang miduyog sa Parada Dabawenyo, sumala sa Davao City Police Office.
Sigon ni DCPO Spokesperson Police Captain Hazel Tuazon, walay natala nga untoward incidents sukad nagsugod ang parada pagkabuntag.
Subay sa report, gibanabana sa kapolisan nga moabot sa singko mil ang mga tawo nga nanan-aw sa parada.
Nahimong igo sab ang anaa sa 2,621 ka mga personnel nga gipakatap atol sa culminating event aron masiguro ang ilang kaluwasan.
Samtang, miduyog usab sa aktibidad si Vice President ug Education Secretary Sara Duterte ug mga igsuon nga sila Davao City 1st District Congressman Paolo Duterte ug Davao City Mayor Sebastian Duterte.
Mokabat sa 354 ka contingents ang misalmot sa Parada Dabawenyo niadtong Domingo nga gilangkuban sa mga grupo nga gikan sa mga ahensya sa gobyerno, mga buhatan sa kagamhanan sa dakbayan, lokal ug nasyonal nga organisasyon, ug lain-laing lebel sa mga tunghaan sa siyudad.
Nagsugod ang parada bandang alas 6 sa buntag sa Roxas Avenue ug natapos sa wala pa ang udto.
Gipakita sa mga contingent ang ilang mga float, giwara-wara ang ilang mga flaglet, nagsaba-saba sa ilang mga sakyanan, ug nagpakita sa ilang labing maayo nga pasundayag sa banda sa kadalanan sa Davao City.
Gikataho sa CDRRMO nga dunay usa ang nakuyapan gumikan sa init nga panahon apan dali sab nila kining natabangan.
Anaa sa kapin kulang 10 ka mga medical response stations ang namuntar sa Central 911.
