DAVAO CITY – Kapin 800 ka mga residente nga apektado sa engkuwentro tali sa mga rebelde ug tropa sa kagamhanan ang mibalik na sa ilang pinuy-anan kagahapong adlawa sa Barangay Suawan Marilog District, human nga gideklara nga luwas na lugar.
Matud pa kang 3rd Infantry Battalion (IB) Civil Military Operations Officer Alenel Valles, anaa sa 30 ka mga gituohang sakop sa New People’s Army ilalom kang Alias Aldrin sa Pulang Bagani Command 2 Southern Mindanao Regional ang naka-engkuwentro sa mga tropa sa kagamhanan niining milabay nga adlaw.
Gikanayong nagpadayon karon ang ilang gipahigayon nga pursuit operation apan wala na matud pay bahad sa barangay diin unang nahitabo ang bakbakan.
Nasayran nga atol sa clearing operation sa encounter site, narekober sa kasundalohan ang 15 ka mga back packs, napulo ka blasting caps, 100-meter electrical wire, usa ka magazine sa M16 rifle, duruha ka AK47 rifle, fifty rounds sa nagkadaiyang bala ug mga subersibong dokumento.
Samtang nahatagan na sab ug assistance sa Davao City Social Services and Development Office (CSSDO) ang mga apektadong pamilya sama sa food packs diin sagad sa mga nahisgutan ang una ng nagpabilin sa Barangay gym sa Marilog District. Una ng gibutyag ni Ltc. Raymund Dante Lachica commanding officer sa 3rd IB nga dili basta-basta sa mga NPA ang ilang naka-enkunwentro kini gumikan sa ilang mga narekober human ang bakbakan.
Mapasalamaton sab ang opisyal sa mga residente nga mitabang kanila hinungdan nga dali ang ilang paggukod sa mga rebelde.
