DAVAO CITY – Gironda sa mga kapulisan sa Davao City Police Office uban ang Criminal Investigation and Detection Group (CIDG) ang gikonsidera nga usa ka Large Scale Illegal Quarrying Operations sa Barangay Lacson, Calinan District, ning syudad sa Davao pasado alas 4 sa hapon niadtong Pebrero 10 ning kasamtangang tuig.
Atol sa maong operasyon, nadakpan ang walo ka mga trabahante ug gipangkumpiska ang mga heavy equipments nga gigamit sa nasampit nga iligal nga operasyon sa Davao River sa Purok 5, sa naasoy nga baranggay.
Ang nahisgutang joint operation mao ang inisyatiba sa mga otoridad kabahin sa Oplan Kalikasan, nga kini ang pagpatuman sa Republic Act 7942 (The Philippine Mining Act of 1995).
Sumala sa kapulisan, nakadawat og reklamo si Brigadier General Nicolas Torres, ang director sa CIDG, nga adunay naghitak nga illegal quarrying sa nasampit nga dapit, hinungdan nga gimando gilayon kini sa opisyal ang pakiglambigit sa Davao City Police Director nga si Colonel Hansel Marantan aron i-validate ang maong sumbong.
Atol sa gipahigayon nga on-site investigation, nakumpirma sa mga otoridad ang presensya sa walay pagtugot nga operasyon sa pag-quarry.
Pipila usab ka mga heavy equipments ug mga sakyanan ang nakita sa nasampit nga lugar nga gilangkuban sa tulo ka mga backhoe, usa ka payloader, lima ka dump truck, ug pipila ka mga dokumento, lakip na usab ang mga delivery receipts ug logbooks.
Atol sa maong operasyon, walo ang nadakpan nga giila nga sila Joven Mose, 40-anyos, Domenic Mose, 21-anyos, Rey Jhon Porta, 19-anyos, Phyl Tumanggong, 36-anyos, Dexter Vilegas Pacatang, 39-anyos, nga mga residente sa Brgy. Dominga, Calinan samtang dakpan usab sila Joshua Atig, 20-anyos, nga taga Brgy. Malamba, Marilog District.
Samtang dakpan usab ang ginganlang Rogelio Redoble Refugio, 45-anyos nga taga Purok 1, Daliaon Plantation, Toril District ug Victorino Camanggayan Banghal, 54-anyos nga taga Sto. Niño, Brgy. Gumalang, Baguio District ning syudad sa Davao.
Sa paghinabi ngadto ka Col. Marantan, sumala pa sa opisyal nga ang nasampit nga operasyon, gipangdumala sumala pa ni Eduardo Majomot Bulala Jr. ug Dana Gidelle Sullano.
Nasayran nga walay gikapakita nga permiso or ligal nga mga dokumento ang mga nahisgutan.
Sa pagkakaron ang mga nahisgutan ang anaa na sa kostudiya sa kapulisan samtang gikatakda usab kini nga pasakahan og tukmang kaso.
Samtang ang mga nakumpiska nga mga butang ang anaa na usab sa mga otoridad karong panahuna.
Maglusad pa usab ang mga otoridad og imbistigasyon kabahin sa nasampit nga iligal nga operasyon kung aduna ba’y nagpaluyo nga mga dagkong tawo dinhi sa syudad.
Samtang padayon usab ang ilahang monitoring sa pipila ka mga lugar dinhi sa dakbayan og sa rehiyon kabahin sa susamang iligal nga aktibidad.
