DAVAO CITY – Gipa-atubang na sa korte kaganihang buntag ang walo ka mga nadakpang suspek nga responsable sa pagkamatay sa usa ka 19 anyos nga college student nga si August Ceazar Saplot.
Kahinumduman nga nakabsan sa kinabuhi ang maong biktima human nga gipailalom sa hazing niadtong Setyembre 18, adlaw nga Dominggo, sa Purok Sto. Niño, Sison Village, Upper Mandug, Buhangin District ning dakbayan.
Ang mga suspek ang miyembro sa fraternity group nga Alpha Kappa Rho, Alpha Delta Chapter sa Davao City. Giila ang mga nahisgutan nga sila Jeremiah Moya; Leji Wensdy Quibuyen; John Lloyd Sumagang; Harold Joshua Flauta; John Steven Silvosa; Ramel John Gamo; Gilbert Asoy, Jr; ug Roseller Gaentano halos mga estudyante sa University of Mindanao.
Kasamtangan pang ginapangita ang laing unom ka mga myembro nga nagpabiling at large karong mga panahona. Samtang sa pikas bahin, gihikay na sab ang patay’ng lawas sa biktima sa usa ka lokal nga punerarya sa may Mandug ug gikatakdang ihatud kini sa iyang panimalay sa Purok 9 Panuntungan, Tibungco ning dakbayan.
