Usa ka Bell 407 nga helicopter ang nahagsa sa Gaurikund, Uttarakhand, India, nga miresulta sa pagkamatay sa tanang pito nga sakay niini, lakip ang piloto.
Ang insidente nahitabo sa sayong kabuntagon kagahapong adlawa, sa usa ka hilit nga lugar sa Uttarakhand, subay sa mga taho sa lokal nga media sa India.
Sumala sa imbestigasyon, pito ang sakay sa helicopter diin lima ka hamtong nga pasahero, usa ka bata, ug ang piloto nga mga Hindu pilgrims nga paingon sa usa ka sagrado nga lugar.
Ang maong aksidente nahitabo pila lamang ka adlaw human ang kalibutan natandog sa pagkahagsa sa usa ka Air India plane sa Ahmedabad, diin 291 ka mga tawo ang patay lakip ang 241 nga sakay sa eroplano.
Nagpadayon karon ang imbestigasyon sa mga otoridad sa India aron masuta ang hinungdan sa nahitabong pagkahagsa.
