DAVAO CITY – Muabot sa 7,000 ka mga personahe ang gikatakdang ipakatag sa Davao City Police office alang sa pag-saulog sa Pasko Fiesta nga ipahigayon sunod bulan. Sumala kang PMaj. Catherine Dela Rey, sa nasangpit nga ihap, 600 niini ang mga auxiliary nga ipakatag latas sa 41 ka mga simbahan sa syudad, alang sa ipahigayon nga Simbang Gabi nga magsugod sa December 16, 2022.
Gipangandaman matod pa sa DCPO ang mga aktibidad sa kapaskohan sama sa ‘Pahalipay sa Taal’ nga ipahigayon sa Desyembre 25, diin lauman matod pa ang pagdagsa sa mga Dabawenyos nga muadto atol sa ‘Pahalipay sa taal’.
Ang Pahalipay sa Taal, ginasaulog matag tuig isip gift-giving tradisyon sa mga Duterte family sa ancestral house ni kanhi Pangulong Rodrigo Duterte nga nahimutang sa Taal Road, Central Park Subdivision sa Barangay Bangkal, dinhi sa syudad , apan nahunong kini duha ka tuig gumikan sa Covid-19 pandemic.
Sa pikas bahin, gikanayon usab ni PRO XI Davao Regional Director Brig. General Benjamin Silo Jr., nga laraw nila ipakatag ang labing-menos 95% sa ilang mga sakop aron masiguro ang siguridad sa syudad. Diin 85% ang ipakatag sa gawas , samtang 15% ang mutrabaho alang sa administratibong trabaho.
Gamiton usab sa DCPO ang ilang Regional Mobile Force aron masiguro ang kalinaw ug kahapsay atol sa pagsaulog sa Pasko dinhi sa Rehiyon. Duna sab imutar nga mga police visibility sa mga mall , terminals ug mga simbahan, diin gilangkoban sa mga Civil Security Unit (CSU), Task Force Davao, ug auxiliary forces ang ipakatag dinhi sa syudad.
