Gilauman nga anaa sa 3,742 ka senior citizens nga adunay edad 80, 85, 90, 95 ug 100 anyos ang makadawat sa maong cash gift. Sumala ni Filbert Bryan Sollesta, project development officer sa NCSC XI, nga ang cash gift dili ayuda o pinansyal nga tabang, kundili pag-ila kini sa kontribyusyon sa mga tigulang sa nation-building.
Ipahigayon sa National Commission of Senior Citizens (NCSC) ang 1st Quarter Cash Gift Distribution sa 2026 sa tibuok Davao Region gikan Marso 16 hangtod Marso 27.
Subay sa Republic Act No. 11982, adunay cash gift ang mga senior citizens nga moabot sa mga giisip nga kalampusan tungod sa naabot niini nga pangidaron diin adunay P10,000 alang sa 80, 85, 90 ug 95 anyos ug P100,000 alang sa 100 anyos ( Usa ka gatos anyos). Nasayran nga sa tibuok Davao Region, mao kini ang gidaghanon sa matag edad, adunay 2,002 ang ihap sa 80 anyos, 1,125 – 85 anyos, 461 – 90 anyos, 132 – 95 anyos ug 22 sa mga nag-edad og 100-years old.
Samtang sa tibuok rehiyon, ang dakbayan sa davao ang adunay daghang mga edaran nga anaa sa 971 beneficiaries, gisundan sa Davao de Oro nga adunay 605, Davao del Norte – 811, Davao Oriental – 505, Davao del Sur – 674 ug ang Davao Occidental adunay 176. Kabahin niini gitambagan ang mga benepisyaryo nga mokontak sa ilang lokal nga OSCA o LSWDO aron makumpirma ang eksaktong schedule ug venue sa payout.
Aron makuha ang cash gift, kinahanglan magpasa ang benepisyaryo og Photocopy sa OSCA ID nga adunay tulo ka pirma o thumbmark.
Kung dili personal nga makakuha tungod sa medikal nga rason, mahimong mag-claim ang awtorisadong representante basta magpresenta og Authorization Letter (NCSC template) Barangay o Medical Certificate Whole-body photo sa benepisyaryo nga adunay current month calendar ug Photocopy sa IDs sa benepisyaryo ug representante nga adunay tulo ka specimen signatures.
Nagpahimangno usab ang ahensya sa mga pamilya nga siguruhong magamit sa mga tigulang ang cash gift alang sa ilahang mga panginahanglanon.
Alang sa mga wala pa’ mga requirements nga mga edaran, makig-alayon lamang sa tagsa-tagsa ka mga baranggay aron maka-avail sa maong programa.
