Nagtuo si International Criminal Court (ICC) Assistant to Counsel Kristina Conti nga 80% ang posibilidad nga mosulod na sa pagtaral ang kaso batok kang kanhi Pangulong Rodrigo Duterte.

Kini tungod sa bag-ong desisyon sa international tribunal nga nagsuporta sa hurisdiksyon sa ICC aron imbestigahan ang drug war nga gipangulohan sa nangaging administrasyon.

Sumala ni Conti, ang maong desisyon sa ICC usa ka klarong timailhan nga magpadayon ang imbestigasyon aron tukion kinsa pa ang uban pang responsable o kauban sa kanhing presidente sa pagpanguna sa madugong kampanya kontra droga.

Dugang pa niya, kini usab usa ka timaan sa posible nga pag-isyu og dugang nga warrant of arrest batok sa ubang mga personalidad nga nalambigit sa maong kalihokan.

Gipunting ni Conti nga kon adunay mosunod nga dakpon, sama ni Sen. Ronald Dela Rosa, mas maayo kuno nga madali kini nga ipatuman.

Gipasabot usab niini nga mas maayo alang sa senador nga boluntaryo nga mosurender sa hurisdiksyon sa korte ug didto na lamang makigbatok subay sa merito sa kaso.

Matod pa ni Conti, mahimo kini buhaton sa senador, ilabi na kung tuyo usab sa iyang kampo nga kwestyunon ang mga warrant of arrest nga posibleng na-isyu na o ipagawas pa lamang sa international tribunal.