DAVAO CITY- “GENUINELY SORRY” – mao kana ang giingon ni Mayor Sebastian ‘Baste’ Duterte ngadto sa usa ka netizen nga gikaingong iyang napakaulawan sa social media tungod sa pagreklamo niini kabahin sa emergency water service interruptions nga nasinatian sa pipila ka dapit sa dakbayan niadtong nakalabay nga mga semana.
Sumala sa mayor, tungod sa maong panghitabo, daghang mga dabawenyo ang nagreport kaniya sa “8888” hotline.
Ang maong hotline ang gipanag-iyahan sa gobyerno diin ang publiko ang mamahimong makaduso sa ilang reklamo, hangyo ug ipadayag ang ilang mga panginahanglan, panglantaw, ug suhestiyon ngadto sa usa ka hingtungdang ahensya sa gobyerno, mga opisyal, o dili ba kaha mga empleyado niini.
Kahinumduman, una nang nangayo og pasaylo sa mayor si Tiara Ramboanga, kinsa maoy nag reklamo kabahin sa maong issue, human gi-post sa Mayor sa iyang social media account ang screenshot sa mensahe nga adunay caption nga “Sunday vibes,” diin anaa ang panagbayloay nila og mensahe ni Ramboanga.
Si Ramboanga, kinsa nisugyot nga tangtangon ang slogan sa turismo sa dakbayan nga “Davao Life is Here,” misaway sa mayor tungod sa giingong kakuwang niini og aksyon sa maong problema. Dugang pa sa mensahe niini, dili na matud pa “livable” ang syudad human milingkod si Baste isip local chief executive.
VIA|| David Francisquete
