DAVAO CITY – Gipagula karon sa National Bureau of Investigation (NBI Xl) ang resulta sa ilang imbestigasyon kalabot sa gipahigayon nga autopsy sa patay’ng lawas ni Amierkhan Mangacop, kinsa gipusil-patay ni Dr. Marvin Rey Andrew Pepino, usa ka Non-Uniformmed Personnel sa PRO-XI.
Bisan sakit sa pamilyang Mangacop nga magpahigayon og autopsy sa lawas sa biktima gumikan sa tinuohang Muslim, gipadayon gihapon kini isip kabahin sa imbestigasyon nga nagtumong makab-ot ang hustisya alang sa biktima.
Subay sa resulta sa autopsy report, ang biktima nakaangkon og unom ka “fatal gunshots” nga maoy hinungdan sa iyang hinanali nga kamatayon.
Narekober sab sa NBI forensic team ang tulo ka bala sa lawas sa biktima diin duruha niini ang anaa sa spinal column; usa ka igo nga mibuslot sa tuo nga atrium sa kasingkasing sa biktima; usa ang sa atay nga hinungdan sa kadaut niini; usa sa tiyan ug spleen; laing usa ang miigo sa large intestine.
Nakaangkon sab si Amierkhan ug bali sa iyang gusok, muscle damage, ug daghanan pa.
Kahinumduman, nangatarungan ang suspek ngadto sa San Pedro Police Station (DCPO Police Station 2) nga self-defense ang iyang gihimo.
Apan subay sa imbestigasyon, nasayran nga walay labot sa nahitabong rumble sa gawas sa usa ka bar si Amierkhan kinsa miadto lamang unta sa lugar aron kuhaon ang ig-agaw niini nga gusto nang mupauli sa balay.
Via || Hana Rallos
