DAVAO CITY – Human ang nahimong kamandoan nga kuhaon ang mga manok sa mga tawo nga nagsabong, nagbahad na sab karon si Davao City Mayor Inday Sara Duterte-Carpio nga pag-imbton ug sunogon ang mga basketball rings sa higayon nga madakpan ang mga residente nga nagdula luyo sa pahimangno sa lokal nga panggamhanan nga likayan ang mass gathering aron nga malikayan ang pagkuyanap sa coronavirus disease 2019 (COVID-19) infection.
Kini ang nahimong pahayag sa Mayor human nga nakadawat kini ug report nga aduna pa gihapoy pipila ka mga indibidwal sa mga barangay ang nagadula ug basketball nga tataw sumala pa nga nakalapas sa quarantine protocols nga gipatuman sa kagamhanan.
Gi-awhag niini ang katawhan nga i-report ang mga quarantine violators ngadto sa otoridad aron nga dali kini nga maaksiyonan ug matangtang gilayon ang mga basketball rings.
Kahinumduman nga una ng nakiglambigit ang mayor kang Davao City Police Office director Col. Kirby Kraft aron nga mas mapahugtan pa ang mga polisiya sa pagpatuman sa quarantine ilabi na karon nga lugwayan ang ECQ hangtud sa Abril 26 ning kasamtangan nga tuig.
