DAVAO CITY – Nag-atubang na karon ug kaso ang usa ka 65 anyos nga lalaki human nga gi-abuso sumala pa niini ang usa ka 13 anyos nga apo sa Buhangin District, ning dakbayan sa Davao sa milabay nga tuig.
Kasong rape ug kalapasan sa Republic Act 7610 o Special Protection against Child Abuse, Exploitation and Discrimination ang gi-atubang sa suspek. Sa gipagulang resolusyon ni prosecutor Jay Karel Sanchez, adunay nakitang lig-on nga basehan aron pasakahan ang akusado subay na sab sa reklamo nga giduso sa biktima.
Nagsugod matud pa ang pagpangmolestiya kaniya dihang nag-edad pa lamang siya ug onse anyos.
Gani nahinumduman pa sa wala hinganli nga biktima nga kaniadtong Hunyo 2014, gibabagan siya sa suspek samtang pagawas gikan sa banyo human nga nangihi ug didto nahitabo ang pagpangmolestiya.
Gibaharan sumala pa siya sa suspek nga dili mosaba aron nga dili kini patyon.
Gikanayong nasundan pa ang maong insidente diin pinaka-ulahi niini ang nahitabo kaniadtong milabay nga Disyembre 9 sa alas nuebe sa gabii. Nahibaw-an sumala pa sa igsuon sa biktima ang pagpangabuso human nga nakita sa bana niini ang iyang igsuon sa usa ka mall sa Toril.
Gipahibalo sumala pa biktima sa bana sa iyang igsuon nga ang suspek ang midala kaniya sa Mall. Ang gidusong reklamo kaniadtong bulan sa Disyembre nga insidente ang naresolba human nga wala gi-avail sa suspek ang iyang katungod alang sa preliminary investigation.
Nagpagula gilayon ug subpoena ang korte batok sa akusado aron nga tubagon ang reklamo nga gikalambigitan niini.
