Subling magpalansang sa Krus ang usa ka 63-anyos nga taga Brgy. Cutud, San Fernando Bulacan karong adlawa. Bisan pa man nga senior citizen na siya karon, wala gihapo’y makapugong kang Ruben Enaje sa pagtuman pag-usab sa iyahang saad sa pagtuo nga iyahang gihimo na kini sulod sa kapin tulo ka dekada ang nakalabay.
Sa ilahang probinsya gitawag siya nga ‘Hesus sa Pampanga,’ ug si Enaje ilangsang sa sulod sa ika-36 nga higayon karong adlawa Biyernes Santo. Kini ang kabahin sa pagpasundayag sa papel ni Hesukristo sa reenactment sa paglansang sa krus isip kabahin sa pagsaulog sa Semana Santa.
Sama sa miaging mga tuig, andam na siya og maayo ug naandam na usab ang mga butang nga iyang gamiton alang sa papel, lakip na ang korona nga tunokon, mga lansang, ug ang krus nga iyang pas-anon sulod sa 1.8 kilometros paingon sa dapit sa paglansang kaniya.
Nasayran nga tungod edaran na ang nahisgutan, mas gaan na ang Krus nga iyahang pas-anon nga mitimbang na lamang og 28 kilos nga hinimo sa fiber glass.
Karong tuiga,uban sa iyahang pagpalansang iyaha usab nga i-ampo ang Kalinaw alang sa nasud ug kaluwasan gikan sa mga katalagman sama sa bag-ohay lamang nga miigong linog sa Myanmar ug Thailand.
