DAVAO CITY – Anaa sa 60 ka mga stranded Dabawenyos sa Cebu ang miabot na sa Davao kagahapong adlawa pinaagi sa sweeper bus trip human ang halos duruha ka bulan nga nangatanggong. Una ng gikumpirma ni Davao City Mayor Inday Sara Duterte Carpio nga miabot ang sweeper bus sa Davao City Overland Transport Terminal (DCOTT).
Sumala sa Mayor nga ang bus trip gipaluyohan sa Office of the Special Assistant to the President (Osap) for the Visayas.
Sumala pa kang Osap Visayas senior staff Girlie Veloso sakay sa bus ang 54 Dabawenyos kalakip na niini ang 20 ka mga blind therapists.
Sagad sumala pa sa mga nangatanggong nga pasahero buot na nga mopapauli sa ilang panimalay human nga nawad-an ug trabaho.
Gawas sa sweeper bus, miabot sab kagahapong ang duruha ka sweeper flights nga gikan sa Manila sakay sab ang Overseas Filipino Workers (OFWs) nga nangatanggong. Gipaluyohan ang maong programa sa Overseas Workers Welfare Administration (Owwa).
Gipasalig ni Mayor Inday nga ipatuman ang health screenings ug protocols samtang nagpadayon ang pagdawat sa mga pasahero nga mosulod sa siyudad.
Una ng gibutyag sa Mayor nga wala niini gipadaplin ang posibilidad nga pipila sa mga pasahero nga sakay sa eroplano ang positibo sa coronavirus disease.
