Miabot na sa 60 ka mga “ghost” o dili tinuod nga flood control projects ang natumbok sa Armed Forces of the Philippines (AFP).
Kini nga mga proyekto kabahin sa tabang nga gihimo sa kasundalohan alang sa Department of Public Works and Highways (DPWH), nga mao gayud ang nag-unang ahensya sa inspection ug verification sa maong mga proyekto, base sa mga available nga public records.
Sumala ni AFP Chief of Staff Gen. Romeo Brawner Jr., ilahang nadawat ang aktwal nga coordinates kung asa unta gibutang ang mga flood control project, ug kini maoy gisubay sa mga sundalo.
Hangtod karon, 60 ka proyekto ang nakit-an sa mga sundalo nga wala gayud matukod o non-existent.
Ang maong mga proyekto adunay kompletong public records sama sa pondo, ngalan sa contractor, ug asa gikan ang pondo.Sa pagkakaron, 8,000 ka flood control projects na ang nasusi sa AFP.
Sumala pa ni Gen. Brawner, posible pa nga mosaka ang ihap niini tungod kay nagpadayon pa ang ilahang paglibot ug inspection sa nagkalain-laing mga lugar.
Sa kinatibuk-an nasayran nga 16,000 ka proyekto ang gihatag sa AFP aron susihon.Gipasabot usab sa heneral nga limitado lamang ang papel sa AFP aron lamang masuta kung adunay natukod nga proyekto sa usa ka lugar gamit ang coordinates nga ilang nadawat.
Wala kuno’y technical expertise ang militar aron tan-awon ang kalidad sa konstruksyon o kung nagtuman ba kini sa teknikal nga mga sumbanan.
Dugang pa ni Gen. Brawner, ang tanan nga mga report kabahin sa flood control projects ilahang ipasa sa DPWH, nga maoy responsable sa pagpadala og mga engineer aron buhaton ang validation sa report nga gihimo sa kasundalohan.
