DAVAO CITY – Mag-atubang og kasong paglapas sa Article 155 Alarms and Scandal sa Revised Penal Code ang unom ka mga suspek nga gitudlong maoy nagpasiugda sa kagubot liwas sa selebrasyon sa Araw ng Digos niadtong nakalabay nga Setyembre 6 ning kasamtangang tuig.
Ang mga nahisgutan ang anaa na karon sa kustodiya sa Digos City Police Station. Gikanayon ni Police Lieutenant Col. Hamlet Lerios, Officer In-Charge sa DCPS, nahitabo ang kagubot alas 3:00 ang takna kaganihang kaadlawon sulod mismo sa Rizal Park sa dakbayan sa Digos.
Subay sa imbestigasyon, samtang naglingaw-lingaw ang katawhan, kalit lamang matud pa nga nagkagubot ang mga nahisgutan diin miresulta kini sa pagsinumbagay ug nag-iyahay na og punit og mga bangko dayun nagbinulanay. Usa sa ginalantaw nga rason sa kagubot mao ang selos sa mga manag-trato ingon man ang pagkalango sa ilimnong makahubog rason nga nawad-an na sa maayong panimout ang mga nahisgutan.
Gibana-banaang anaa sa kapin kun kulang P100,000 ka pesos ang namugnang damyos ngadto sa mga gamit sa mga vendors. Gilayon sab nga nakontrola sa kapulisan ang maonog kagubot ug gidala sa kwerpo sa kapulisan ang mga salawayon nga indibidwal.
