DAVAO CITY – Gipasakaan na ug kasong Robbery ang lima ka mga construction workers apil na ang security guard nga mi-unay sa pagransak sa opisina sa ilang gitrabahuang constrtuction company sa Malagos ning syudad.
Kahinumduman nga dali nga nadakpan sa kapulisan ang mga suspect nga gilangkuban sa upat ka mga construction worker ug security guard sa kompanya kansa nanag-kunsabo aron kawaton ang mga kahimanan sa konstruksiyon sa maong buhatan.
Giila sa Davao city police office (DCPO) ang mga suspect nga sila Mario Villamor Bargo – 21; James Batistis Villamor 21, Jovert Colon Casimiro 22, Clint Devero Badiola 23, ang security guard nga si Rene Alcantara Lopez 30 anyos pulos nagpuyo sa Purok 3-A Malagos, Baguio district ning syudad ug Meljohn Amelita Tumolak, 18 anyos, taga Molave Stret, Phase 3 Mintal Relocation ning syudad.
Subay sa report, gitulis sa mga dinakpan ang RG Berry Construction – usaka contractor sa Malagos Drug Rehabilitation Center ala 1:30 sa hapon niadtong adlaw nga domingo.
Paspas nga milusad ug imbestigasyon si Sr. Insp. Merlito Tubog – hepe sa Baguio Police Precinct, hinungdan nga 6 ka oras human sa pagpanulis dali nga nadakpan ang unom ka mga suspect pagka-alas 3:30 sa hapon.
Nasayran nga gisulod sa mga suspect ang warehouse agi sa rooftop niin.
Na-recover sa kapulisan gikan sa posisyon sa mga suspect ang tulo ka Dewalt electric hand drills, 2 Dewalt buffer sanders, usaka Dewalt electric saw cutter, usaka Dewalt electric edger, usaka Power arc portable welding machine ug duha ka rolyo sa flex wire.
Gibana-bana nga moobalos ug halos 125 mil ka pesos ang gikawat nga mga construction tools.
